how to create your own web page for free
Mobirise
Coas Ideas Claras

Pensar e construir o Xinzo do futuro coas ideas claras

Iso queremos, contigo. Poñer en marcha un novo proxecto de vila dinámica, consciente do seu potencial e orgullosa da súa identidade. Xa somos referencia internacional do Entroido e podemos aspirar a moito máis. Queremos un Xinzo que recupere o papel de liderazgo na Limia como capital administrativa, motor comercial e que aproveite todo o potencial como cabeceira dunha das comarcas agro-gandeiras máis importantes do País.

Hai moitas cousas a mudar, levamos anos navegando sen rumbo, sen obxectivos e sen unha definición clara do que queremos para o noso pobo e o noso concello e nótase. Sínteno cada día as veciñas e veciños ao saír á rúa. Sínteno as comerciantes. Sínteno as nenas e nenos que xogan nos parques e nas prazas. Sínteno os maiores que cada día van ficando máis sós nas nosas aldeas.

Dende o Concello pódese facer moito máis, débese facer moito máis! Dar resposta aos servizos básicos que demandan os cidadáns, xestionar os recursos de todas e todos con eficacia e estar á fronte das inquietudes e peticións colectivas para impulsalas, reivindicalas e defendelas onde sexa necesario. Axudar aos sectores productivos. Facer da cultura, do patrimonio e da nosa historia milenaria un recurso que xere riqueza. Afrontar o reto demográfico dende as capacidades e competencias ao alcance do Concello para frearmos a sangría continua dos últimos anos e fixar poboación. Mais todo isto só se pode facer dende o goberno, por iso, queremos contar co apoio das veciñas e veciños e queremos gobernar o Concello de Xinzo. No BNG sabemos facelo. Témolo demostrado nos #concellosBNG con proxectos que funcionan e hoxe xa son realidades que melloran día a día a calidade de vida de miles de galegas e galegos. Xinzo non pode ser unha excepción.

Somos un grupo de veciños e veciñas de Xinzo comprometidos co noso pobo e respaldados por unha organización que ten acreditada a defensa do noso País e queremos demostrar que outra política é posible.

É o momento de apostar por un Xinzo novo, verde, integrador, respectuoso co medio e coa xente. Agora temos nas nosas mans novamente a oportunidade de mudar todo, a oportunidade de non resignarnos, a oportunidade de soñar cun futuro diferente, a oportunidade de que os soños se fagan realidade.

5 Ideas Claras
5 Obxectivos para un tempo novo 

1

Xinzo lugar para vivir

Ofertaremos vivenda pública municipal en arrendamento protexido e proporcionaremos asesoramento permanente para a rehabilitación e adquisición de vivenda na vila e no rural limiaos.

2

Xinzo terra de emprego

Fomentaremos a creación de tecido industrial e emprego baseados na transformación da nosa produción pataqueira e agro-gandeira. Potenciaremos un sector servizos e hostaleiro que comercialicen e prestixien o produto final, creando valor engadido e con compromiso ecolóxico.

3

Xinzo xestionando os servizos públicos

O noso Concello exercerá como tal. Traballaremos pola remunicipalización dos servizos básicos, auga, lixo, para xestionalos directamente, garantindo a eficiencia dos mesmos e a súa natureza pública. Xinzo recadará os seus impostos. Recuperaremos a xestión do Museo Galego do Entroido.

4

Xinzo capital cultural

Crearemos políticas turísticas. Poremos en valor o noso patrimonio natural, etnográfico e lingüístico. Colaboraremos de xeito estábel coas universidades galegas. A oferta sociocultural e artística serán un atractivo para locais e visitantes todo o ano.

5

Xinzo humanizado e vertebrado

Garantiremos o transporte público e regular entre a vila e os pobos. Pularemos pola rehabilitación do casco vello e potenciaremos o uso peonil da vía pública, regulando racionalmente o tráfico. Nova política de residuos e limpeza das nosas rúas. As políticas de igualdade serán transversais a toda actuación municipal.

Bloque Nacionalista Galego de Xinzo de Limia | bngxinzo.gal